Neikvæðar hugsanir gera fólk ekki aðeins leitt og dapurt heldur hafa þær einnig áhrif á allan líkamann. Á hinn bóginn geta jákvæðar hugsanir styrkt ónæmiskerfið og hjálpað hjartanu að halda sér heilbrigðu og hjartslættinum í góðum takti.

Þetta eru niðurstöður breskrar rannsóknar sem náði til 135 manns eftir því sem segir í umfjöllun The Telegraph.

Þátttakendunum var skipt í fimm hópa og fengu þeir mismunandi fyrirmæli á meðan hjartsláttur og svitaframleiðsla þátttakendanna var mæld. Þá voru þátttakendurnir spurðir út í tilfinningar sínar.

Tveir hópar fengu leiðbeiningar sem áttu að hjálpa fólkinu að hugsa jákvæðar og rólegar hugsanir en hinir hóparnir fengu leiðbeiningar sem áttu að vekja neikvæðar hugsanir.

Niðurstaðan var að hóparnir, sem hugsuðu jákvætt, voru með betri hjartslátt og svitnuðu minna. Auk þess var fólkið almennt jákvæðara í mati á tilfinningum sínum.

Þeir neikvæðu voru með örari hjartslátt, svitnuðu meira og það var hægt að tengja hugsanir þeirra við hótanir og stress.

Anke Karl, aðalhöfundur rannsóknarinnar, segir að rannsóknin hjálpi til við að öðlast skilning á hvernig er hægt að nota jákvæðar hugsanir við sálfræðimeðferð.