Systurnar, Paityn Decker, 9 ára, Evelyn Decker, 8 ára, og Olivia Decker, 5 ára, sáust síðast á lífi á föstudag þegar faðir þeirra sótti þær en hugðist skila þeim stuttu seinna þennan sama dag.
Þegar þær skiluðu sér ekki til baka á föstudagskvöld hófst leit og fannst bifreið Travis mannlaus á mánudag. Lík systranna fundust svo síðar þennan sama dag en Travis var hvergi sjáanlegur. Hann var heimilislaus en dvaldi meðal annars á tjaldsvæðum eða í bifreið sinni.
Mike Morrison, lögreglustjóri í Chelan-sýslu, hvatti Travis til að gefa sig fram í samtölum við bandaríska fjölmiðla í gær. „Við munum ekki una okkur hvíldar fyrr en við finnum hann,“ sagði hann. „Hann gæti verið hvar sem er í landinu, þannig að þess vegna þurfa allir að hafa augun opin,“ sagði Morrison áður en hann talaði beint til Travis.
„Travis, ef þú ert að hlusta á þetta þá er tækifærið núna til að gefa þig fram. Gerðu það rétta, taktu ábyrgð á gjörðum þínum. Við munum finna þig og þú verður dreginn til ábyrgðar, þessar þrjár stúlkur eiga það skilið,“ sagði hann.
Travis þessi er fyrrverandi hermaður og telur lögregla að hann geti lifað af úti í óbyggðum mánuðum saman.
