Mannlaust skip rak á strendur Írlands eftir að óveðrið Dennis gekk yfir Bretlandseyjar og nágrenni um helgina. Um er að ræða 77 metra flutningaskip sem ber nafnið Alta og er skráð í Tansaníu.

Skipið hefur rekið stjórnlaust um Atlantshafið síðan í október 2018, en þá kom bandaríska strandgæslan tíu skipverjum til bjargar eftir þeir lentu í ógöngum úti á hafi.

Það var svo á sunnudag að skipið endaði för sína í Ballycotton á suðurströnd Írlands. Írsk yfirvöld hafa reynt að ná sambandi við eigendur skipsins en án árangurs. Enginn leki er frá skipinu að svo stöddu en yfirvöld telja möguleika á að skipið reki aftur á haf út og skapi þar með hættu fyrir önnur skip.