Það getur borgað sig að fara varlega þegar farið er í vatnsrennibrautir og gæta að öryggi annarra sem eiga leið niður brautirnar. Þessu fékk ung móðir að kynnast þegar hún fór eina bunu í vatnsrennibraut á hóteli í Faralya Mah, sumarleyfisstað í Tyrklandi.
Jemma Joslyn var nýkomin á hótelið þegar hún skellti sér í sundfötin og út í garð með tveimur börnum sínum. Þegar hún var nýkomin niður brautina úr fyrstu ferðinni skall kona, sem kom á eftir, á henni af miklum þunga og voru afleiðingarnar vægast sagt hrikalegar. Fimm rifbein brotnuðu, nýru og lifur sködduðust verulega og hlaut hún innvortis blæðingar. Barðist hún fyrir lífi sínu á sjúkrahúsi í kjölfarið.
Konan sem kom á eftir henni niður brautina var stór og mikil um sig og hefði varla þurft að spyrja að leikslokum ef hún hefði skollið á litlu barni. Jemma var flutt á Esnaf-sjúkrahúsið í Fethiye þar sem hún lá inni í nokkra daga eftir slysið.
Slysið átti sér stað í september síðastliðnum og segist Jemma enn vera að glíma við afleiðingar þess. Hún mun bera ör á líkamanum það sem eftir er – sem er ekki það versta – og skerta nýrnastarfsemi. Jemma bókaði ferðalagið með Thomas Cook og hefur hún nú stefnt ferðafyrirtækinu; engar viðvaranir voru við brautina og ekkert starfsfólk til að tryggja öryggi sundlaugargesta.
Þá segir Jemma að Thomas Cook hafi lítið sem ekkert gert til að aðstoða hana. Hún var ein á ferðalagi með tveimur ungum börnum sínum. Að lokum fór það svo að foreldrar Jemmu fóru til Tyrklands til að hlúa að börnunum tveimur.
