Leikfélag Sólheima frumsýndi í gær, sumardaginn fyrsta, leikritið Galdrakarlinn í Oz í íþróttaleikhúsinu á Sólheimum. Með leikstjórn verksins fer Guðmundur Lúðvík Þorvaldsson.

Sagan af Galdrakarlinum í Oz, eftir L. Frank Baum, kom fyrst út árið 1900. Sagan segir frá ævintýrum litlu stelpunnar Dóróteu, sem lendir í því að fellibylur feykir húsi hennar til framandi töfralands. Dórótea þarf að leita hjálpar hjá galdrakarlinum í Oz til að komast heim, en á leiðinni hittir hún ljón, fuglahræðu og skógarhöggsmann úr tini og saman lenda þau í miklum ævintýrum.

Söngleikur byggður á sögunni kom út árið 1902 og 1939 var gerð kvikmynd byggð á sögunni. Judy Garland fór með aðalhlutverkið og sló myndin í gegn um allan heim. Verkið hefur oft verið sett upp á Íslandi í mismunandi leikgerðum á undanförnum áratugum, en á Sólheimum verður stuðst við leikgerð Ármanns Guðmundssonar, sem gerði hana fyrir Leikhópinn Lottu árið 2008.

Leikfélag Sólheima hefur verið starfandi frá árinu 1931 og er því 85 ára í ár. Leikfélagið sem er skipað íbúum Sólheima og nágrennis, ungum sem öldnum, fötluðum og ófötluðum, hefur í gegnum tíðina tekist á við fjölbreytt verkefni eftir innlenda og erlenda höfunda, klassísk og verkefni sérstaklega samin fyrir leikfélagið.
Fjórar sýningar verða haldnar um helgina og þá næstu, en miða er hægt að tryggja sér í síma 847-5323.