Sandkorn:

Ásgerður Gylfadóttir, þingmaður Framsóknarflokksins, segir í samtali við Fréttablaðið að margir þingmenn upplifi Alþingi sem ekki „fjölskylduvænan“ vinnustað. Hún kvartar sárann undan vinnuálagi og löngum vinnudegi en nefnir ekki að þingmenn séu mánuðum saman á árinu í fríi. Þingmenn fá svo vel ríflega ein milljón króna í mánaðarlaun.

Ásgerður er fyrsti flutningsmaður frumvarps um að skipaður verði starfshópur um að Alþingi verði „fjölskylduvænn“ vinnustaður. Svo virðist sem það þýði færri þingfundi á kvöldin. „Það þarf að vera meiri fyrirsjáanleiki í skipulagi vinnunnar þannig fólk hafi tíma til að undirbúa sig innan eðlilegs vinnutíma. Þingmannsstarfið er 24/7 starf,“ hefur Fréttablaðið eftir henni. Hún nefnir sem dæmi að þingmenn þurfi að mæta á fjölda viðburða. Sem sagt kokteilboð. Greyin.

Líkt og fyrr segir þá er heldur erfitt að færa rök fyrir því að þingmennska, með að lágmarki 1,1 milljón krónur í laun, sé mikil kvöl og pína. Meðan eðlilegt fólk þarf að vinna myrkrana á milli fyrir lægri laun þá byrjar jólafríið hjá Ásgerði og kollegum hennar yfirleitt um 14. desember. Lýkur svo um mánuði síðar.

Það er ekki furða að álit alþýðunnar á Alþingi sé í ruslflokk þegar helsta baráttumál sumra þingmanna sé að gera lífið enn auðveldara fyrir þá sjálfa.