Jóhann Páll Jóhannsson, umhverfis-, orku- og loftlagsráðherra, furðar sig á nýjasta útspili stjórnarandstöðunnar – að ala á ótta við Evrópusambandið. Veltir ráðherrann fyrir sér hvort stjórnarandstæðingar séu hreinlega gengnir af göflunum.

Jóhann skrifar á Facebook: „Ég er hræddur um að stjórnarandstaðan sé gengin af göflunum. Fyrst misbuðu þau þjóðinni með lengsta málþófi sögunnar og létu eins og minnihlutinn hefði neitunarvald á Alþingi, jafnvel gagnvart stórum og stefnumarkandi málum ríkisstjórnar. Svo hlaupa þau upp til handa og fóta yfir því að forseti framkvæmdastjórnar Evrópusambandsins heimsæki Ísland. Sturlast yfir því að leiðtogi stærstu viðskiptablokkar heims, með mörgum okkar helstu vinaþjóðum, ræði við íslenska ráðamenn um viðskiptakjör Íslands og varnar- og öryggismál á breyttum tímum.“

Jóhann segir að nú séu stjórnarandstæðingar að koma með samsæriskenningar um að Þorgerður Katrín Gunnarsdóttir utanríkisráðherra ætli að smygla Íslandi inn í Evrópusambandið og forseti framkvæmdastjórnar sambandsins, Ursula von der Leyen, taki við tilskipunum frá forsætisráðherra Íslands, Kristrúnu Frostadóttur, um hvað hún eigi að segja á blaðamannafundum. Jóhann Páll segir hreint með ólíkindum að kjörnir fulltrúar séu að tjá sig með þessum hætti.

„Þessar samsæriskenningar eru ekki settar fram af einhverjum bloggurum útiíbæ eða samfélagsmiðla-bottum heldur af helstu talsmönnum minnihlutans, gamalla og virðulegra stjórnmálaflokka á Alþingi. Fólk sem talar svona, þyrlar upp hræðsluáróðri og beitir sér gegn vestrænni samvinnu með þessum hætti er upptekið við eitthvað allt annað en að gæta að hagsmunum Íslands og gera samfélagið okkar betra.“