Ögmundur Jónasson, fyrrverandi ráðherra, segir að ekki ríki einhugur hjá þjóðinni um milljarða stuðning Íslendinga til Úkraínu vegna stríðsins við Rússa. Þetta kemur fram í aðsendri grein Ögmundar í Morgunblaðinu í dag.

Ögmundur bendir á að í lok þessa árs verði fjárveitingar Íslendinga til Úkraínu komnar upp í 10 milljarða, en hluti þeirra fer í vopnakaup. Hann segir að ólíkt framlögum vegna hamfaranna í Grindavík, eða aukaframlögum inn í heilbrigðiskerfið, ríki alls ekki einhugur á meðal landsmanna um þessa ráðstöfun.

„Stuðning­ur við stríðshrjáð fólk á vissu­lega rétt á sér en ekki við þá víg­væðingu sem ís­lenska rík­is­stjórn­in og Alþingi hafa skuld­bundið okk­ur til að veita,“ segir Ögmundur og tjáir efasemdir um þá stefnu að óvinir Nató eigi sjálfkrafa að verða óvinir íslensku þjóðarinnar. Hann telur ekki rétt að líta skilyrðislaust á Rússa sem óvini og vill að við nálgumst deiluna með frið að leiðarljósi.

„Vígvæðing grefur undan friði,“ skrifar Ögmundur og átelur hann þjóðir Evrópu fyrir að láta vopnaiðnaðinn teyma sig gagnrýnislaust út í fjáraustur til hernaðar.

„Kjarn­orku­vopn eru á leið nær landa­mær­um Rúss­lands, evr­ópsk hag­kerfi eru að koma sér í stríðsham og und­ir allt þetta tek­ur Ísland. Nær dag­lega heyr­um við for­svarsmenn Alþing­is og rík­is­stjórn­ar­inn­ar tala fyr­ir hærri út­gjöld­um til sam­starfs í NATÓ,“ skrifar Ögmundur og líst honum ekki á blikinu. Sú afstaða að vinir okkar séu í Nató og líta beri á óvini Nató sem óvini Íslands hugnast honum ekki.

Hann segir: „En þá spyr ég hvort við þurf­um ekki að graf­ast fyr­ir um hversu rétt­lát­ir þess­ir meintu vin­ir okk­ar hafi verið gagn­vart veik­b­urða og fá­tæk­um þjóðum og þá einnig hvort all­ir óvin­ir þeirra og jafn­vel vin­ir óvina þeirra séu óverðugir vináttu okk­ar?“