Á Alþingi í gær var samþykkt stjórnarfrumvarp um niðurfellingu tolla á vörur sem eru upprunnar í Úkraínu. Að vanda var óskað eftir umsögnum um frumvarpið og svöruðu Bændasamtök Íslands kallinu.
Umsögn samtakanna hefur vakið nokkra athygli en þar segjast samtökin meta það svo að lausn á vanda Úkraínu sé falin í því að bundinn verði endir á stríðsátökin sem þar geisa.
Í umsögn segir: „Þá er það afstaða Bændasamtaka Íslanda að lausn á vanda Úkraínu felist í því að bundinn verði endir á stríðsátökin sem þar geisa. Ísland eigi því að beita sér á alþjóðavettvangi fyrir því að gert verði vopnahlé eða með öðrum hætti bundinn endi á stríðsátökin.“
Bændasamtökin segjast tilbúin til frekari aðkomu að málinu: „Verði þess óskað eru fulltrúar samtakanna reiðubúnir til frekari aðkomu að máli þessu til frekari umræðu og skoðanaskipta.“
Varðandi sjálft frumvarpið taka Bændasamtökin undir varnarorð sem koma fram í greinargerð frumvarpsins um að ef frumvarp verði að lögum geti það leitt til þess að fluttar yrðu til Íslands landbúnaðarvörur frá Úkraínu í meira mæli en nú sem geti haft neikvæð áhrif á verð og framboð íslenskra landbúnaðarvara. „Í ljósi erfiðrar stöðu í íslenskum landbúnaði sökum gríðarlegra hækkana á aðföngum hafa samtökin því eðlilega áhyggjur af því hvaða áhrif innflutningurinn kann að hafa á félagsmenn.“
Leggja samtökin til að niðurfelling tolla nái eingöngu til þeirra landbúnaðarafurða sem að jafnaði hafa verið fluttar inn frá Úkraínu, magn þess sem megi flytja inn tollfrjálst verði skilgreint og tryggt verði að heilbrigðiskröfum verði fylgt.
Almannatengillinn Karen Kjartansdóttir vakti í gær athygli á umsögn Bændasamtakanna á Facebook og á Twitter.
„Þegar maður óttast áhrif innflutt mjólkurdufts en telur sig geta tjónkað við Pútín.
Mér fannst þessi greining Bændasamtakanna á vanda Úkraínu, sem óvænt birtist í umsögn samtakanna við frumvarp Bjarna Benediktssonar, fjármála- og efnahagsráðherra, um að fella niður tolla af vörum frá Úkraínu, ekki fá næga athygli í vikunni.“
1/3 Mér fannst þessi greining Bændasamtakanna á vanda Úkraínu, sem óvænt birtist í umsögn samtakanna við frumvarp Bjarna Benediktssonar fjármála- og efnahagsráðherra, um að fella niður tolla af vörum frá Úkraínu, ekki fá næga athygli í vikunni. pic.twitter.com/Uus7SqKLJL
— Karen Kjartansdottir (@karenkjartansd) June 15, 2022
nei, við treystum okkur ekki í þessa niðurfellingu á tollum en treystum okkur til að koma að friðarviðræðum við Pútín ef þið óskið.
— Karen Kjartansdottir (@karenkjartansd) June 15, 2022
