Björn Jón Bragason gerir störf borgarstjórnar að umtalsefni í nýjasta pistli sínum Á þingpöllunum í DV. Hann ræðir þar um fjölgun borgarfulltrúa:
„Samfylking, Viðreisn, Píratar og Vinstri græn mynda nú meirihluta en það hefði ekki reynst mögulegt ef borgarfulltrúum hefði ekki verið fjölgað úr 15 í 23 því þá hefðu Vinstri græn ekki náð inn manni. Óbreytt tala borgarfulltrúa hefði einnig haft í för með sér að Flokkur fólksins hefði ekki fengið neinn kjörinn en Sjálfstæðisflokkur hlotið sex menn, Samfylking fimm og Viðreisn, Píratar, Sósíalistaflokkur og Miðflokkur sinn fulltrúann hvern.“
Björn segir ófremdarástand ríkja í borgarstjórninni:
„Við öllum blasir að átök hafa magnast í borgarstjórninni síðustu misserin. Fundir hafa lengst úr hömlu og ítrekað sýður upp úr. Það er eins og fulltrúarnir kjósi margir að koma sér fyrir í skotgröfum líkt og tíðkast á Alþingi án þess að gera sér grein fyrir því að eðli borgarstjórnar er allt annað. Borgarstjórn Reykjavíkur hefur mikilvægu eftirlitshlutverki að gegna að lögum en ekki verður séð af fundargerðum að því sé sinnt. Fjölgun borgarfulltrúa hefur einnig haft verulegan kostnað í för með sér.“
Meira um málið í nýjasta tölublaði DV.
