Staksteinar Morgunblaðsins í dag skafa ekki utan af  því er þeir segja í upphafi daglega pistilsins að RÚV brjóti í sífellu lög um hlutleysi í fréttaumfjöllun. Kjarni skrifanna er hins vegar ásökun um tvískinnung af hálfu RÚV í umfjöllun um meint sóttvarnabrot ráðamanna undanfarið, að hafa tekið með allt öðrum hætti á meintu sóttvarnabroti forsætisráðherra og fjármálaráðherra:

„Ríkisútvarpið er nýkomið með nýjan þjónustusamning sem gildir út árið 2023 og hyggst af því tilefni halda áfram að brjóta lög um hlutleysi í fréttaumfjöllun. Þegar sóttvarnayfirvöld með heilbrigðisráðherra í broddi fylkingar tóku við bóluefnum í fyrradag með ræðuhöldum og fjölmenni sem var langt yfir sóttvarnamörkum gerði Rúv enga kröfu um afsögn nokkurs manns og gerði yfirleitt ekkert mál úr þessu samkvæmi. Og þó að heilbrigðisráðherra stæði grímulaus í fjölmenninu og ræddi við fjölmiðla var ekkert fundið að því og ráðherrann ekki spurður ítrekað út í afsögn.“

Þá segir enn fremur:

„Þegar forsætisráðherra var í faðmlögum við Seyðfirðinga, ekki alla grímuklædda, gerði Rúv. enga tilraun til að knýja fram afsögn. Rúv. frétti ekki einu sinni af þessum málum.“

Staksteinar segja að hvorugt málið sé stórmál og ekki afsagnarsök. En ef RÚV hefði í heiðri lög sem um stofnunina gilda og kveða á um hlutleysi verði ekki hjá því komist að ræða um uppsögn beggja ráðherra. Telur höfundur að RÚV hygli ráðherrum í VG á kostnað ráðherra í Sjálfstæðisflokknum. Staksteinar segja að tvískinnungur RÚV sé viðvarandi og ekkert bendi til að hann muni hverfa í framtíðinni.

„Og þetta voru svo sem ekki stórmál, bara tvö dæmi um yfirsjónir og hvorug afsagnarsök. En ef Rúv. héldi í heiðri lög sem um það gilda og kveða á um hlutleysi verður ekki séð hvernig þessi ríkisstofnun gæti komist hjá því að ræða afsögn við þessa tvo ráðherra. Og það ítrekað.

En þessir ráðherrar eru að vísu í vinstri grænum. Væru þeir í öðrum hvorum hinna stjórnarflokkanna þarf ekki að efast um hvernig tekið yrði á þessum augljósu brotum.

Og því miður bendir ekkert til að þessi tvískinningur stofnunarinnar sé á undanhaldi, nema síður sé.“