Ekki er hægt að greiða fyrir flugfar hjá Air Iceland Connect með reiðufé, þó svo skýrt sé greint frá því í lögum um gjaldmiðil Íslands að seðlar og mynt Seðlabanka Íslands skuli vera lögeyrir til allra greiðslna.

Morgunblaðið greindi frá því um helgina að reynt hafi verið að greiða fyrir flugfar frá Egilsstöðum til Reykjavíkur í síðustu viku, með seðlum í afgreiðslunni. Ekki var tekið við peningum viðkomandi. Bauðst annars farþegi til að greiða farið með korti, og fékk sömu upphæð tilbaka  í peningum frá viðkomandi.

Vita ekki til þess að þetta sé ólöglegt

Félagið tekur aðeins við kortum og millifærslum, en þessi breyting tók gildi fyrir um ári síðan, samkvæmt Árna Gunnarssyni, framkvæmdastjóra Air Iceland Connect. Hann segir að 90% flugfarþega greiði fyrir flugfar sitt á heimasíðu félagsins, en einnig sé í boði að millifæra inn á reikning félagsins, sem einnig sé hægt í gegnum snjallsíma.

Árni tekur fram að hann viti ekki til þess að þetta sé ólöglegt, þó svo skýrt sé kveðið á það í lögum um Seðlabanka Íslands:

„Við erum þjón­ustu­fyr­ir­tæki og ákveðum að veita þessa þjón­ustu með þess­um hætti. Notk­un á reiðufé er orðin mjög tak­mörkuð. Það fylg­ir því viðbót­ar­kostnaður að taka við reiðufé miðað við að taka allt í gegn­um kort,“

segir Árni.

Það svarar því ekki kostnaði fyrir Air Iceland Connect að fara eftir lögum og vera með skiptimynt og seðla í afgreiðslu sinni í slíkum undantekningartilfellum, þar sem það kostar of mikið, en félagið sagði nýlega upp sjö flugmönnum til að bregðast við aðstæðum á markaði og samdrætti í farþegaflutningum vegna fækkunar ferðamanna. Greint var frá því á dögunum að Air Iceland Connect  hygðist minnka flugvélaflota félagsins og fækka vélum úr sex í fjórar. Þá hefur félagið fækkað ferðum til Egilsstaða og Ísafjarðar yfir vetrartímann og sömuleiðis hætt að fljúga á milli Keflavíkur og Akureyrar.

„Við sögðum upp þremur flugmönnum í júní og núna um mánaðamótin er fjórum sagt upp til viðbótar. Við erum í raun að bregðast við aðstæðum á markaði. Það er samdráttur í hagkerfinu og við endurspeglum þann veruleika. Það þarf að aðlaga fjöldann að starfseminni,“

sagði Árni um rekstrarvanda félagsins við DV.

Kveðið á um allar greiðslur

Í lögum um gjaldmiðil Íslands segir:

3. gr.
„Peningaseðlar þeir, sem Seðlabanki Íslands lætur gera og gefur út, og peningar þeir, sem hann lætur slá og gefur út, skulu vera lögeyrir í allar greiðslur hér á landi með fullu ákvæðisverði.“

Í lögunum segir einnig að engum sé skylt að taka við mynt (klinki) yfir 500 krónum, nema bankar og sparisjóðir:

6. gr.
„Eigi eru aðrir en bankar og sparisjóðir skyldugir að taka við greiðslu í einu á meira fé en 500 krónum í slegnum peningum.“

Samkvæmt lögum er því öllum skylt að taka við peningum sem greiðslu, svo framarlega sem það sé ekki yfir 500 kall í klinki.