Ég nefndi það í gær að ekki væru aðgengilegar samanteknar upplýsingar um hverjir byðu sig fram í prófkjörum hjá Pírötum. En nú hefur verið gerð bragarbót á þessu.

Hér er vefurinn piratar.is og þar eru ýmsar upplýsingar um prófkjörin hjá Pírötunum.

Þarna er að finna upplýsingar um þá Pírata sem sækjast eftir sæti í Reykjavíkurkjördæmunum tveimur og í Suðvesturkjördæmi og í  Suðurkjördæmi.

Samkvæmt vefnum er hægt að tilkynna um þátttöku í kjördæmunum á höfuðborgarsvæðinu til 1. ágúst, hið sama gildir um Suðurkjördæmi. Þar fara prófkjörin fram í „opnu kosningakerfi“ 2.-12. ágúst með svokallaðri Schulze aðferð. Í Norðvesturkjördæmi er hægt að tilkynna framboð til 7. ágúst, en þar fer prófkjörið fram 8.-14. ágúst.

Á vefnum segir um kjörgengi og kosningarétti:

Kjörgengir í prófkjörum eru allir skráðir Píratar sem uppfylla skilyrði um kjörgengi til Alþingiskosninga. Kosningarétt í prófkjörum hafa skráðir Píratar samkvæmt lögum Pírata, eða þeir Píratar sem skráðir hafa verið í Pírata 30 dögum áður en kosningu lýkur.

Enn eiga væntanlega eftir að bætast frambjóðendur í hópinn og veitir kannski ekki af miðað við upplýsingarnar sem þarna er að finna. Prófkjör Píratanna í Norðausturlandi var þeim ekki sérstaklega til framdráttar. Einungis 78 manns greiddu atkvæði í prófkjörinu, en efsta sætið hreppti Einar Brynjólfsson framhaldsskólakennari.