Í fréttum má sjá að Reykjavíkurborg hyggist leggja hálfan milljarð í byggingu nýrra salerna fyrir ferðamenn. Ekki eru allir jafn sáttir með þetta, borgarfulltrúinn Hildur Sverrisdóttir telur hættu á að ef tillögurnar nái fram að ganga verði hér „almenningsklósett með nánast tíu metra millibili“.
Hildur nefnir meðal annars að nær væri að byggja almenningssalerni neðanjarðar – fremur en klósettturnana sem er að finna víða um borg.
Þetta er athyglisverð hugmynd og í þessu sambandi má minna á haustið 1958, en 5. október það ár birtist þessi frétt í dagblaðinu Tímanum.
Þarna er einmitt greint frá áformum um að byggja „náðhús úr steynsteypu“ neðanjarðar á lóð í Hljómskálagarðinum við Sóleyjargötu. Byggingin hefur átt að vera hin myndarlegasta, 100 fermetrar hvorki meira né minna.
Af fréttinni má líka ráð að menn hafi verið stórhuga á þessum tíma, því einnig er þess getið að áform hafi verið uppi um byggingu fleiri „almenningsnáðhúsa“, meðal annars við Hlemmtorg.
.
