Erna Kristín Stefánsdóttir, guðfræðingur, áhrifavaldur og aktívisti fyrir jákvæða líkamsímynd, er með skothelt ráð til að komast í kjólinn fyrir jólin.
Hún segir frá því í nýjustu færslu sinni á Instagram, þar sem hún er með rúmlega 17 þúsund fylgjendur.
„Styttist í jólin og eins og þið vitið þá fylgir því herferð þar sem við erum mötuð á matarsamviskubiti og skyndilausnum hvernig er best að grennast til að komast í „kjólinn fyrir jólin.“ Eins gott að byrja strax ekki satt. Sjálf ætla ég að byrja snemma að undirbúa mig,“
skrifar Erna Kristín og fer yfir þau sex skref sem þarf að fylgja til að komast í kjólinn fyrir jólin.
„Fyrsta skref: Ég finn hinn fullkomna jólakjól.
Skref tvö: Ég passa að hann sé sléttur og straujaður fyrir jólin.
Skref þrjú: Ég stilli klukkuna mína á 16:00 á aðfangadag. Gott að vera tímalega fyrir næstu skref.
Skref fjögur: Ég byrja á því að fara í sokkabuxurnar og haldarann (sem oftast nær er íþróttatoppur frá því að ég var 17 ára).
Skref fimm: (Þetta er mikilvægasta skrefið, gott að undirstrika það vel): Ég fer í kjólinn í þeirri stærð sem passar mér.
Skref sex: Ég dansa inn í jólin á réttum tíma í hinum fullkomna kjól, sem ég valdi í þeirri stærð sem ég passa í og akkúrat þannig krakkar, komist þið í fjandans kjólinn fyrir jólin.
Svo bara njóta og elska sjálfan sig og muna, þú kemst í kjólinn fyrir jólin. Þetta snýst bara um að kaupa kjólinn í réttri stærð.“
https://www.instagram.com/p/B2ufZbPgdmi/
Færsla Ernu Kristínar hefur fengið mikil viðbrögð og hafa rúmlega 760 manns líkað við hana.
