Sigmundur Davíð Gunnlaugsson, formaður Miðflokksins, hefur yfir miklu að gleðjast þessa dagana enda hefur fylgi flokks hans aukist mikið síðustu mánuði. DV ákvað því að spá í tarotspil fyrir formanninn og sjá hvað framtíðin ber í skauti sér.
Fyrsta spilið sem kemur upp er Sólin. Sólin táknar mikla sköpun og gleði, sem og manneskju sem á stóra drauma og er jákvæð með eindæmum. Sigmundur þarf að huga að jafnvæginu innra með sér og muna að það er kærleikur sem skiptir mestu máli í samskiptum í samfélagi manna. Orkustöðvar Sigmundar eru öflugar og óskir hans um áframhaldandi uppgang Miðflokksins eru raunhæfar. Draumar hans verða að veruleika fyrr en hann grunar og hann mun öðlast það vald sem hann þráir innan skamms.
Næsta spil er 9 stafir, en talan níu sýnir Sigmundi svart á hvítu að gleðin þarf að vera viðvarandi í hans lífi og störfum því of mikil alvara þjónar ekki neinum tilgangi. Spilið táknar einnig einhvers konar þjáningar í æsku eða vandamál sem efla Sigmund í leit hans að árangri og velgengni. 9 stafir tákna einnig að Sigmundur þarf að læra af mistökunum til að ná þeim árangri sem hann dreymir um.
Síðasta spilið sem kemur upp fyrir Sigmund er 7 mynt. Þar er enn farið yfir fortíðina og ítrekað að Sigmundur megi ekki láta fortíðina koma í veg fyrir velgengni framtíðarinnar. Honum finnst eins og allir séu á móti honum og sér oft ekki hversu góðir tímar eru framundan. Heppnin leikur við Sigmund og óskir hans rætast en talan sjö staðfestir velferð hans. Alsæla birtist og leggst bókstaflega að fótum hans og mun Sigmundur fá aðgang að auðæfum fyrr en síðar.
