Aaron McLean fyrrum atvinnumaður í knattspyrnu segir frá hreint ótrúlegri sögu þegar samherji hans ákvað að grípa um skaufa hans á fyrsta degi.

McLean gekk í raðir Hull árið 2011 en Jimmy Bullard var þar allt í öllu sem einn besti leikmaður liðsins.

Bullard er þekktur sprelligosi og McLean komst fljótt að því. „Ég sá Bullard og alla leikmennina vera að hita upp á fyrsta degi, Bullard var hoppandi á bakið á markmönnunum og ég veit ekki hvað,“ segir McLean.

„Ég hugsa með mér að þessi gæi sé gjörsamlega klikkaður, hann tekur þessu ekki alvarlega. Eftir fyrstu æfinguna þá skelli ég mér í sturtu.“

McLean átti ekki von á því sem gerðist næst. „Hann kemur í sturtuna og grípur strax um skaufann á mér og segir ´Andskotinn, það eru helvítis þyngsli í þessu´. Ég var að koma til liðsins, var í klefa með mönnum sem ég þekkti ekkert.“

„Ég reyndi að hlæja en mín fyrsta hugsun var að þetta væri klikkaður hópur manna. Hvað átti ég að gera? Ég kýli ekki Jimmy Bullard á fyrsta degi, þetta var furðuleg byrjun.“