Ársþing KSÍ er í dag og verður nýr formaður sambandsins kjörinn. Guðni Bergsson, fyrrum formaður, Þorvaldur Örlygsson og Vignir Már Þormóðsson eru í framboði en svo virðist sem Guðni og Vignir séu sigurstranglegri.

Þetta var tekið fyrir í Íþróttavikunni sem kemur alla föstudaga. Til að mynda var rætt um könnun á Vísi á meðal aðildafélaga þar sem Guðni var með 34% fylgi, Vignir 31% og Þorvaldur 31%.

„Það verður að taka þessu með fyrirvara þar sem færri en 40% taka þátt en það verður að segjast að Toddi er í sannkallaðri brekku. En af þessum 40% sem svöruðu voru 28% óákveðin svo það eru fullt af atkvæðum þarna úti sem virðast liggja. En svona skoðannakönnun getur skemmt fyrir Þorvaldi. Þeir sem voru að spá í að kjósa hann gætu hugsað með sér að atkvæði til hans væru hreinlega dauð atkvæði, þau ýti undir það að það verði önnur umferð,“ sagði Hörður Snævar Jónsson, en það verður önnur umferð á milli tveggja efstu ef enginn nær 50% í fyrstu tilraun.

„Þeir tveir virðast vera að berjast um þetta og þá veltir maður fyrir sér hvort þeir sem hafi haft hug á að kjósa Þorvald kjósi hann eða hvar þau muni falla, hvort þau fari þá frekar til Vignis eða Guðna. Ég hallast að því að þau fari til Vignis en það er ómögulegt að segja til um það.“

Það kemur Herði mjög á óvart að Þorvaldur mælist með svo lítið fylgi.

„Mér hefur fundist Þorvaldur vera með mjög sterkt mál í aðdragandanum. Mér finnst hann hafa talað vel, hugmyndirnar hans verið góðar. Hann hefur verið óhræddur við að tala um niðurskurð í sambandinu, sem virðist þurfa að fara í. Hann hefur talað máli sem mér finnst raunhæft varðandi Laugardalsvöll. Við erum ekkert að fara að fá nýjan völl á næstunni, ég held að allir þurfi að fara að gera sér grein fyrir því. Ég hélt þeir væru allir þrír á svipuðu reki þannig það kom mjög á óvart hvernig hann kom út úr þessari könnun.“

Umræðan í heild er í spilaranum, en ársþingið hefst klukkan 11 í dag.