Thierry Henry, goðsögn Arsenal og fyrrum leikmaður Barcelona, ræddi við vin sinn Xavi í gær eftir leik Barcelona við Napoli í Meistaradeildinni.

Um var að ræða leik sem fór fram á Ítalíu en honum lauk með 1-1 jafntefli og er Barcelona í fínum málum fyrir seinni leikinn.

Xavi gaf það út fyrr á árinu að hann væri að segja af sér sem þjálfari Barcelona eftir um þrjú ár í starfi og kom það mörgum á óvart.

Xavi hefur verið gagnrýndur vegna frammistöðu Barcelona á þessu tímabili en Henry hafði ekkert nema góða hluti að segja í leikslok.

,,Ég er hissa á hversu góðum árangri þú hefur náð, mér er alveg sama hvað aðrir segja,“ sagði Henry er hann ræddi við Xavi.

,,Þú vannst deildina með Barcelona, ég er stoltur, ég veit hver þú ert. Ég er stoltur af því að hafa spilað með þér, þú kenndir mér mikið.“

,,Eitt sinn sagðirðu við mig: ‘Þú getur talað þegar þú hefur unnið eitthvað með Barcelona og þá skilurðu hvaða þýðingu þetta félag hefur.’ – Ég vil þakka þér fyrir það.“