Rúnar Alex Rúnarsson hefur verið kynntur til leiks hjá FC Kaupmannahöfn. Hann skrifar undir þriggja og hálfs árs samning.
Markvörðurinn kemur frá Arsenal. Samningi hans þar var rift í dag í kjölfar þess að hann var kallaður til baka úr láni frá Cardiff.
Rúnar hefur verið hjá Arsenal síðan 2020 en verið lánaður til Leuven í Belgíu og Alanyaspor í Tyrklandi, auk Cardiff, á tíma sínum þar.
Rúnar lék þó sex leiki með Arsenal, þar af einn í ensku úrvalsdeildinni.
Hann er nú mættur til Danmerkur þar sem hann spilaði áður með Nordsjælland. Mun hann veita Kamil Grabara samkeppni um stöðu markvarðar, en sá er á förum til Wolfsburg í sumar.
„Ég þekki félagið, borgina og deildina mjög vel. Ég veit að þetta er risastórt félag. Ég hlakka til að vera hluti af þessum hóp og vinna með hinum markvörðunum. Ég mun gefa allt sem ég á og veita hinum markvörðunum góða samkeppni,“ segir Rúnar við heimasíðu FCK.
