Jón Dagur Þorsteinsson landsliðsmaður segist fullur tilhlökkunar fyrir komandi leiki Íslands í undankeppni EM 2024.

Ísland mætir Slóvakíu á laugardag og Portúgal þremur dögum síðar. Mikilvægi leikjanna er mikið og þá sérstaklega þess fyrri.

„Það er fiðringur fyrir hvern einasta landsleik. Auðvitað er þetta ótrúlega mikilvægur leikur og við gerum okkur grein fyrir því. Vonandi náum við í úrslit. Það væri góð byrjun,“ segir Jón Dagur við 433.is.

Age Hareide verður að stýra sínum fyrstu leikjum sem þjálfari Íslands.

„Hann er mjög reynslumikill og mun nýtast okkur frábærlega held ég.“

Jón Dagur var að klára sitt fyrsta tímabil með Leuven í Belgíu. Hann gerði vel og skoraði 12 mörk.

„Þetta var mjög fínt fyrsta tímabil. Það tók smá tíma að koma mér inn í hlutina en ég endaði þetta á góðum nótum þó svo við sem lið hefðum viljað enda þetta betur.“

En verður hann áfram hjá Leuven?

„Ég bara veit það ekki. Mér líður mjög vel þarna og finnst gaman að spila í deildinni. Það kemur í ljós,“ segir Jón Dagur og bætir við að engin tilboð hafi borist annars staðar frá hingað til.

Viðtalið í heild er hér að neðan.