Kylian Mbappe hefur tjáð sig eftir fréttafár í kringum hann síðan í gærkvöldi.
Mbappe skrifaði undir tveggja ára samning við PSG í fyrra með möguleika á árs framlengingu. Aðeins hann gat virkjað þann möguleika. Kappinn sendi PSG svo formlegt bréf í gær um að það myndi hann ekki gera og er stjórn félagsins ansi hissa. Sá möguleiki hefði nefnilega sjálfkrafa verið sleginn af borðinu 1. ágúst næstkomandi, nema samið væri um annað.
„Ég hef aldrei rætt það við PSG að framlengja samninginn minn. Stjórnin hefur vitað það síðan 15. júlí 2022 að ég mun ekki framlengja,“ segir í tilkynningu Mbappe.
„Bréfið sem ég sendi var bara til að staðfesta það sem ég hafði þegar sagt þeim.“
PSG er sagt íhuga það alvarlega að selja Mbappe. Það vill ekki missa hann frítt svo það er annað hvort að selja hann í sumar eða sannfæra hann um að skrifa undir nýjan samning.
