Bono, markvörðurinn sem hefur farið á kostum með landsliði Marokkó á Heimsmeistaramótinu í Katar, er í dag orðaður við Bayern Munchen.

Þýska stórveldið leitar að markverði til bráðabirgða í kjölfar þess að Manuel Neuer meiddist á skíðum og verður frá út tímabilið.

Sky Sports segir að Bayern horfi því til Bono, sem heillaði er Marokkó fór alla leið í undanúrslit HM og vann lið á borð við Spán og Portúgal á leið sinni þangað. Kappinn er á mála hjá Sevilla á Spáni.

Markvörðurinn Alexander Nubel er hugsaður sem langtímalausn í marki Bæjara, eftir að Neuer hverfur á braut. Sá er hins vegar á láni hjá Monaco.

Sem stendur er Sven Ulreich varamarkvörður Bayern en ekki er ljóst hvort félagið ætli að treysta á hann.

Bono gæti því verið lausn fyrir félagið.