Manchester United sparar sér væna summu á því að losa sig við Cristiano Ronaldo.
Brottför Ronaldo frá félaginu var staðfest í gær. Hann hefur verið mikið í umræðunni undanfarið eftir umdeilt viðtal sem hann fór í við Piers Morgan á dögunum, þar sem hann brenndi allar brýr að baki sér hjá United.
Portúgalinn gagnrýndi stjórann Erik ten Hag til að mynda harkalega og sagðist ekki bera virðingu fyrir honum. Eftir viðtalið var tímaspursmál hvenær Ronaldo yfirgæfi Old Trafford.
Báðir aðilar sömdu um að Ronaldo myndi yfirgefa félagið strax. Hann fær ekkert af þeim launum sem hann átti inni og sparar United sér því um sautján milljónir punda. Telegraph segir frá.
Laun Ronaldo voru um tíu prósent af heildar launaútgjöldum United. Gæti þetta gert Ten Hag kleift að kaupa meira inn í janúarglugganum.
Ronaldo getur nú einbeitt sér að fullu að Heimsmeistaramótinu í Katar, þar sem hann er með portúgalska landsliðinu.
Liðið hefur leik á morgun þegar það mætir Gana.
