Barcelona og Manchester United drógust saman í umspilinu um sæti í 16-liða úrslitum Evrópudeildarinnar í dag.
Í pottinum voru þau lið sem höfnuðu í öðru sæti í sínum riðli í riðlakeppni Evrópudeildarinnar og þriðja sæti í sínum riðli í Meistaradeild Evrópu. Liðin sem vinna einvígi sín fara í 16-liða úrslit, ásamt þeim liðum sem unnu riðla sína í Evrópudeildinni.
Barcelona endaði í þriðja sæti í riðli með Bayern Munchen, Inter og Viktoria Plzen í Meistaradeildinni. Aftur fékk liðið erfiðan drátt í dag.
„Aftur fáum við erfiðasta mögulega mótherjann. Við hlökkum samt til,“ segir Xavi, stjóri Barcelona.
Hann er hrifinn af því sem er í gangi hjá United. „Þetta er sögufrægt félag. Liðið hefur vaxið mikið undir Erik ten Hag. Þeir eru með frábæra leikmenn. Þetta er versti dráttur sem við gátum fengið, engin heppni þarna á ferð.“
Cristiano Ronaldo er á mála hjá United. Hann mætti Xavi oft er hann var á mála hjá Real Madrid, en Xavi spilaði auðvitað með Barcelona á leikmannaferlinum.
„Hann er frábær leikmaður. Hann hefur sett mark sitt á þennan kafla í fótboltasögunni og getur enn gert gæfumuninn,“ segir Xavi um Portúgalann.
