Það er ekki ljóst hvar miðvörðurinn Ísak Óli Ólafsson mun leika á næstu leiktíð. Hann er samningsbundinn Esbjerg en þar ríkir óvissa.

Esbjerg féll óvænt niður í dönsku C-deildina á síðustu leiktíð. Það er mikið högg fyrir félagið sem er fremur stórt á danskan mælikvarða.

Umboðsmaður Ísaks ræddi við 433.is í dag og sagði að þeir hafi ákveðið að bíða með að taka ákvörðun þar til lengra yrði liðið á sumarið.

Esbjerg er með bandaríska eigendur sem þykja umdeildir. Það er hugsanlegt að breyting verði á eigendum í sumar. „Við ákváðum að bíða og sjá hvernig Esbjerg kæmi undan sumri,“ sagði Guðlaugur Tómasson, umboðsmaður Ísaks, við 433.is.

Ísak á tvö ár eftir af samningi sínum við Esbjerg. „Þeir láta hann ekki fara nema það komi eitthvað spennandi upp og hann fer ekki nema það verði spennandi,“ sagði Guðlaugur einnig.

Ísak hefur verið á mála hjá Esbjerg síðan í fyrra. Þar áður var hann hjá Sönderjyske í dönsku úrvalsdeildinni. Hann lék að láni með Keflvíkingum, sínu uppeldisfélagi, hluta síðasta sumars.

Miðvörðurinn á að baki sjö A-landsleiki fyrir Íslands hönd.