Forráðamenn KR hafa ekki rætt þann kost að skoða stöðu Rúnars Kristinssonar sem þjálfara liðsins. Þetta segir Páll Kristjánsson formaður knattspyrnudeildar við 433.is.
KR er fjórtán stigum á eftir toppliði Breiðabliks eftir ellefu leiki í Bestu deildinni en KR situr í sjötta sæti deildarinnar. KR er félag sem vill berjast um þann stóra en Blikar hafa stungið öll önnur lið af.
Páll segir það ekki hafa verið rætt að skoða stöðu Rúnars. „Nei sú umræða hefur ekki átt sér stað. Auðvitað eru menn að hugsa stöðuna hvernig er hægt að bæta liðið en það er enginn þjálfarakapall í kortunum,“ segir Páll í samtali við 433.is.
Páll segir að allir KR-ingar séu ósáttir með stöðu liðsins en Rúnar hefur mikla virðingu í Vesturbæ og þar hafa menn trú á að liðið komist á flug.
„Staðan er hins vegar óásættanleg, allir KR-ingar eru ósáttir sama hvort það séu stuðningsmenn, leikmenn eða þjálfarar. Við erum ekki að horfa í neinn titil núna en við erum stutt frá öðru sætinu og erum enn með í bikarnum.
„Við höfum að mörgu leyti verið óheppnir. Rúnar hefur allan okkar stuðning sem þjálfari.“
