Eric Djemba-Djemba, fyrrum leikmaður Manchester United, hefur tjáð sig um erfitt samband miðjumannsins Kleberson og fyrirliða liðsins á sínum tíma, Roy Keane.

Keane og Kleberson náðu ekki vel saman í Manchester en ferill Kleberson hjá félaginu var stuttur og spilaði hann þar frá 2003 til 2005.

Kleberson var mjög eftirsóttur leikmaður er hann samdi við Man Utd en hann spilaði 32 landsleiki fyrir Brasilíu á sínum ferli og vann til að mynda heimsmeistaramótið.

Keane var alls ekkert lamb að leika sér við og hikaði ekki við að bauna beint á Brasilíumanninn sem var öðru vanur og brást ekki vel við andlega.

Djemba-Djemba hefur tjáð sig um samband leikmannna tveggja og talar um atvik eftir leik í Meistaradeildinni þar sem Kleberson var miður sín eftir persónulega ‘árás’ frá Keane.

,,Roy hraunaði yfir Kleberson. Kleberson leit út fyrir að vilja ekki spila leikinn miðað við líkamstjáningununa og vildi spila rólegri bolta,“ sagði Djemba-Djemba.

,,Ég man eftir einum leik á Old Trafford þar sem við mættum inn í búningsklefa og Keane öskraði á hann: ‘Þú þarft að vakna! Þú þarft að gefa allt í þetta og þarft að tækla boltann. Af hverju viltu ekki spila? Þú varst að vinna HM, hvað gerðist? Þú þarft að spila betur!’

,,Þetta gerði Kleberson hræddan. Hann var alltaf brosandi og var líka brosandi þegar Keane lét hann heyra það sem gerði Keane enn reiðari.“

Kleberson spilaði á endanum aðeins 20 deildarleiki fyrir Man Utd og skoraði í þeim tvö mörk. Hann var síðar á mála hjá Besiktas, Flamengo, Bahia og fleiri liðum.