Andrúmsloftið hjá Manchester United er annað í dag en það fyrir lok síðasta tímabils samkvæmt varnarmanninum Raphael Varane.

Varane gekk í raðir Man Utd fyrir síðustu leiktíð en upplifði ekki frábært fyrsta tímabil á Englandi undir stjórn bæði Ole Gunnar Solskjær og síðar Ralf Rangnick.

Erik ten Hag hefur samþykkt að taka við Man Utd og skrifaði undir samning í sumar og mun sjá um að drilla liðið fyrir næstu leiktíð.

Varane segir að leikmenn liðsins séu spenntir og er tilhlökkun að vinna með nýjum stjóra sem er með öðruvísi hugmyndir en þeir sem voru áður.

,,Þetta er nýtt tímabil sem þýðir ný byrjun, allir eru mjög spenntir fyrir nýja þjálfaranum,“ sagði Varane.

,,Augljóslega viljum við gera vel og vinna alla leiki og þurfum að undirbúa okkur fyrir tímabilið. Það er mikilvægt fyrir okkur að æfa og vera tilbúnir.“

,,Við viljum vera klárir.r Við þurfum að leggja hart að okkur og æfingarnar verða margar og leikirnir verða margir.“

,,Andrúmsloftið er öðruvísi í dag, undirbúningstímabilið er í gangi og við þurfum að koma okkur í gang.“