Glódís Perla Viggósdóttir, lék í kvöld sinn 100. A-landsleik fyrir íslenska kvennalandsliðið þegar að Ísland vann 5-0 sigur á Hvíta-Rússlandi. Hún var að vonum ánægð með sigurinn og þá staðreynd að Ísland er komið í bílstjórasætið í sínum riðli.

,,Þessi leikur var bara flottur af okkar hálfu. Við erum í smá brasi í byrjun en svo um leið og við skorum fyrsta markið kemur ró í leik okkar,“ sagði Glódís á blaðamannafundi eftir leik.

Hún segir það ótrúlega gaman og mikinn heiður að vera í þessu íslenska liði og að hafa fengið traustið í öllum þessum 100 leikjum til þessa. ,,Vonandi verða leikirnir miklu fleiri.“

Aðspurð um framhaldið segir hún það kýrskýrt.

,,Framhaldið er bara leikur á þriðjudaginn á móti Tékklandi sem við ætlum að vinna. Við erum með þetta í okkar eigin höndum en það var mjög gott að koma úr þessum leik með sannfærandi sigri. Leikurinn á móti Tékkum verður allt öðruvísi.“

Sara Björk Gunnarsdóttir sneri aftur í íslenska landsliðið í kvöld eftir langa fjarveru. Glódís segir það ótrúlega gott að fá hana aftur inn.

,,Hún kemur inn með mikla reynslu og er frábær leikmaður. Við erum bara glaðar að fá hana inn. Hún styrkir hópinn gríðarlega mikið.Sara má vera mjög stolt af sér og við erum glaðar að fá hana aftur,“ sagði Glódís Perla Viggósdóttir, á blaðamannafundi íslenska landsliðsins eftir yfirburðar 5-0 sigur á Hvíta-Rússlandi í dag.