Sir Alex Ferguson hefur ekki þjálfað Manchester United í níu ár en þrátt fyrir það er gamli karlinn enn að þéna verulegar upphæðir í hverri viku.
Samkvæmt enskum blöðum þénar Ferguson í dag um 235 þúsund pund á viku sem gerir rúmar 40 milljónir íslenskra króna.
Tekjurnar hefur Ferguson í gegnum fjárfestingar, útgáfu á bókum, fyrir það að koma fram og svo er hann með 2 milljónir punda á ári sem sendiherra Manchester United.
Ferguson var nær dauða en lífi fyrir nokkrum ár þegar hann fékk heilablóðfall árið 2018. Hann hefur síðan náð góðum bata og er í fullu fjöri.
Ferguson vann ensku úrvalsdeildina þrettán sinnum sem stjóri Manchester United og er einn merkilegasti karakter í sögu fótboltans.
