Bayern Munchen fór illa með Union Berlin á heimavelli sínum í efstu deild Þýskalands í dag.
Kingsley Coman kom bæjurum yfir á 16. mínútu. Tanguy Nianzou tvöfaldaði forystuna tæpum tíu mínútum síðar.
Skömmu fyrir leikhlé bætti Robert Lewandowski við marki af vítapunktinum.
Lewandowski var svo á ferðinni með fjórða mark Bayern snemma í seinni hálfleiknum. Þar við sat, lokatölur 4-0.
Bayern er á toppi deildarinnar með 63 stig, 7 stigum á undan Dortmund sem á þó leik til góða.
Union situr í áttunda sæti með 38 stig.
