Valsmenn eru nýkomnir heim frá Tenerife þar sem liðið dvaldi í 10 daga við æfingar. Birkir Már Sævarsson, leikmaður Vals, segir að það sé kominn fiðringur að fara byrja Bestu deildina en hann settist í sófann í íþróttavikunni með Benna Bó á föstudaginn.

„Við vorum búnir að æfa nóg í slagviðri og hríð. Við höfum samt ekki sleppt æfingu nema kannski einni. En annars höfum við farið út og djöflast í snjónum.“

Hann viðurkennir að gæðin á æfingum hafi ekkert verið frábær á sumum æfingunum – svona í mestu hríðarbyljum. „Gæðin verða ekkert æðisleg en eigum við ekki að segja að þetta herði okkur og búi til karakter.“

Birkir segir að það sé kominn fiðringur að reima Puma takkaskóna sína og fara byrja. „Ég er ánægður með liðssöfnun á Hlíðarenda. Það eru geggjaðir fótboltamenn komnir og fyrir voru heill haugur af geggjuðum fótboltamönnum sem er ennþá betra. Ég er mjög hrifinn af skildinum.

Ég treysti að við lyftum skildinum á Hlíðarenda, ég sé það fyrir mér í draumum mínum.“