Jurgen Klopp var heldur betur sáttur með frammistöðu sinna manna í dag eftir 5-0 sigur gegn Watford á Vicarage Road.
Þrír fremstu mennirnir sáu um markaskorunina fyrir Liverpool. Robert Firmino skoraði þrennu og Mo Salah og Mane skoruðu eitt mark hvor.
„Þetta var flott! Ég get ekki sagt annað,“ sagði Jurgen Klopp í viðtali við BT Sport eftir leik. „Það er erfitt að finna taktinn eftir landsleikjahlé og ólík leikkerfi, en strákarnir stóðu sig mjög vel þrátt fyrir að hafa einungis æft einu sinni fyrir daginn í dag. Ég held að Watford hafi verið með hugmyndir en við leyfðum þeim ekki að spila. Mörkin voru frábær, það var gott hugarfar, orka og karakter.“
Aðspurður út í Mohamed Salah sagði Klopp „Frammistaða hans var feikisterk í dag. Sendingin fyrir fyrsta markið var frábær og seinna markið var einstakt. Við sjáum það öll. Hver er betri en hann? Við þurfum ekki að tala um afrek Messi og Ronaldo í fótboltanum og þeir yfirburði. En eins og staðan er núna er hann bestur.“
