Jón Þór Hauksson verður áfram þjálfari Lengjudeildarliðs Vestra. Félagið tilkynnti að Jón hefði gert nýjan tveggja ára samning í dag. Hann er ánægður með að hafa gengið frá nýjum samningi við Vestra og hlakkar til komandi tíma með liðinu.
Fréttaritari heyrði í Jóni Þór áðan og spurði hann hvernig líðanin er nú þegar að búið er að ganga frá samningi við hann.
,,Mér líður hrikalega vel. Ég átti frábæra tíma með liðinu á síðasta tímabili og er mjög spenntur fyrir framhaldinu. Það er gaman að fá tækifæri til þess að halda áfram þeirri þróun sem að var hjá okkur seinnipartinn í sumar,“ sagði Jón Þór í samtali við 433.is.
Auk þess að ganga frá samningi við Jón Þór voru samningar tveggja lykilleikmanna liðsins einnig endurnýjaðir. Jón segir það hafa verið ákveðna forsendu fyrir áframhaldandi samstarfi.
,,Fyrir mig hefur það mikla þýðingu að samningar við þessa leikmenn voru endurnýjaðir. Það voru forsendur fyrir því að ég myndi halda áfram að við myndum halda þessum leikmannakjarna og geta haldið áfram að taka skref fram á við. Það hefur oft verið staðan að byggja hefur þurft upp nýtt lið tímabil eftir tímabil.“
Nafn Jóns Þórs skaust oft upp í umræðuna þegar þjálfarastöður voru lausar hjá félögum í efstu deild en hann segist ekki hafa farið í viðræður við nein önnur lið en Vestra.
„Ég átti engar viðræður við önnur lið, ég fékk margar fyrirspurnir en fór ekki í viðræður við annað lið. Það er búinn að vera langur aðdragandi að þessu. Við Sammi erum búnir að vera vinna að þessu í langan tíma og þá helst þeim hluta sem snýr að því að halda sama leikmannakjarna.“
Jón Halfdán Pétursson var aðstoðarþjálfari Jóns Þórs á síðasta tímabili og hann á von á því að það samstarf haldi áfram.
„Okkar samstarf gekk vel og Nonni er Vestramaður í gegn, hann og hans fjölskylda sinna öllum mögulegum hlutverkum í þessu félagi og hvort sem hann verður aðstoðarþjálfari minn eða ekki þá verður hann alltaf í kringum liðið.“
Jón Þór tók við Vestra um mitt síðasta tímabil og segir tímann á Ísafirði bæði innan og utan vallar hafa verið frábæran.
,,Þetta hefur verið frábær tími fyrir mig og fjölskylduna. Ísafjörður og staðirnir í kring eru mjög fallegir og það var tekið alveg svakalega vel á móti okkur. Ég er í skýjunum með allt í kringum félagið og það er frábært að fá tækifæri til þess að halda áfram að þróa þetta lið,“ sagði Jón Þór Hauksson, þjálfari Vestra.
