„Tómur, þannig líður mér. Tómur en spenntur, þreyttur en fullur af eldmóði, bjartsýnn en líður óþægilega,“ Með þessum orðum hefst pistill Alans Shearer, goðsagnar hjá enska félaginu Newcastle United, goðsögnar í ensku úrvalsdeildinni.
Opinber fjárfestingasjóður Sádí Arabíu keypti Newcastle United á dögunum fyrir um 300 milljónir punda og búast má við miklum breytingum hjá félaginu vegna þess. Um leið tók 14 ára eignarhaldstíð Mike Ashley á félaginu enda.
Það er óhætt að segja að Mike Ashley hafi ekki verið vinsæll meðal stuðningsmanna Newcastle United og þar með talið Alans Shearer.
„Við getum fagnað því að 14 hörmuleg ár hafa nú tekið enda og við tekur eitthvað nýtt. Eitthvað sem hefur möguleika á að vera stórt. Mike Ashley er horfinn á brott og ég þarf nánast að klípa mig til að koma þeirri staðreynd fyrir í kollinum á mér,“ skrifaði Alan Shearer í pistli sem birtsit hjá The Athletic.
Shearer segir að sala Mike Ashley á félaginu sé eins og ferskur andblær og mikill léttir. „Fyrir ungu stuðningsmenn Newcastle er hann sá eini sem hefur átt Newcastle í þeirra tíð og það brýtur í mér hjartað.
Nýtt eignarhaldsfélag undir stjórn Mohammed Bin Salman, tekur nú við félaginu en Bin Salman hefur sjálfur ekki verið laus undan gagnrýni er snúa að mannréttindabrotum og morðinu á blaðamanninum Jamal Khashoggi.
„Eignarhald Sádi-Arabíu á félaginu mun nú verða að fyrirsögnum. Newcastle United verður nú auðugasta knattspyrnufélag heims en það er minn skilningur að farið verði hægt í sakirnar hvað varðar uppbyggingu.“
„Ég vil bara að við verðum öll á sömu blaðsíðu. Gefið okkur knattspyrnufélagið okkar aftur, ég vil bara finna þessa tengingu aftur. Ég vil bara að nýjir eigendur reyni að bæta félagið og að því gangi vel. Ég held að ég tali fyri flesta stuðningsmenn Newcastle þegar að ég segi það,“ skrifaði Alan Shearer í pistli sem birtist hjá The Athletic.