Það er nánast útilokað að Vestri geti spilað heimaleik sinn gegn Víkingi í undanúrslitum bikarsins á heimavelli á laugardag. Vonskuveður hefur verið á Vestfjörðum og völlurinn er á kafi í snjó.

„Það er það nánast útilokað, ef við setjum tæki inn á völlinn þá erum við mögulega að stúta honum,“ sagði Samúel Samúelsson formaður Vestra í samtali við 433.is í dag.

Vestri mun því spila leikinn gegn Víkingi í Vesturbænum á heimavelli KR.

Leikmenn Vestra hafa ekkert getað æft síðustu daga vegna veðurs en vonast til að komast í Borgarnes í dag til að hefja æfingar. Það er þó ekki öruggt þar sem samgöngur eru erfiðar og leiðin í bæinn hefur verið lokuð frá því í gær.

„Rigningin í gær og nótt fór alveg með þetta. Snjórinn er það þungur og þéttur að það er ekki sens að blása þessu burtu af vellinum,“ segir Samúel einnig.

Vestri átti gott sumar í Lengjudeildinni en sigur liðsins gegn Val í átta liða úrslitum á Ísafirði er ein stærsta saga sumarsins í fótboltanum. Víkingur varð Íslandsmeistari um liðna helgi en leikmenn Vestra vonast til að geta strítt besta liði landsins um helgina.