Achraf Hakimi, bakvörður Paris Saint-Germain, var í viðtali nýlega við franska blaðið L’Equipe. Þar ræddi hann argentíska snillinginn Lionel Messi.
Hakimi og Messi gengu báðir til liðs við PSG í sumar. Hakimi var keyptur frá Inter. Messi kom óvænt frá Barcelona í kjölfar fjárhagsvandræða Katalóníufélagsins.
,,Það kom mér, eins og öllum öðrum, mikið á óvart að Messi skildi fara frá Barca, ég bjóst ekki við því. Þegar ég heyrði að hann væri að koma hingað, hvað get ég sagt? Það var draumur fyrir mig. Ég hef spilað með mörgum frábærum leikmönnum. Ég átti bara eftir að spila með Messi. Ég er stoltur af því að fá að vaxa sem leikmaður með honum,“ sagði Hakimi.
Hakimi sagði einnig að það hafi komið sér á óvart hversu rólegur Messi er.
,,Við tölum sama tungumál svo smám saman erum við að kynnast. Það kom mér á óvart hvernig hann hegðar sér. Hann er rólegur.“
