,,Það er eitt lið á vellinum. Ég er ekki frá því að þetta sé ein okkar besta frammistaða okkar í sumar,“ sagði Kári Árnason, leikmaður Víkings, við Stöð 2 Sport þegar hálfleikur er í leik liðsins gegn Leikni.

Víkingar eru 2-0 yfir gegn Leikni í hálfleik í þessum leik í lokaumferð Pepsi Max-deildarinnar. Endi leikurinn svona verður Víkingur Íslandsmeistari í fyrsta sinn í 30 ár.

Kári er í banni í þessum leik. Hann er því áhorfandi á leiknum í dag og er ekki sérlega hrifinn af því. ,,Það er hrikalegt,“ sagði Kári um það að þurfa að horfa á leikinn í dag en ekki spila hann.

Kári var mjög ánægður með fyrri hálfleikinn hjá sínum mönnum.

,,Halldór Smári er búinn að vera rosalega agressívur, vinnur boltann í hvert skipti sem þeir spila upp á senterinn. Sölvi stendur alltaf fyrir sínu. Það er yndislegt að sjá þessa stráka springa út undir pressu.“ 

Hann varar stuðningsmenn Víkings þó við því að tveggja marka forysta geti reynst hættuleg.

,,Ég vil ekki sjá neitt kæruleysi, þetta er stórhættuleg forysta.“