Aaron Ramsdale, markvörður Sheffield United, vill fara til Arsenal. Það er undir Lundúnafélaginu komið að greiða fyrir þennan 23 ára gamla leikmann. Sky Sports greindi frá þessu fyrr í dag.

Ramsdale féll úr ensku úrvalsdeildinni með Sheffield United á síðustu leiktíð. Þar áður var hann á mála hjá Bournemouth. Þar féll hann einnig niður um deild.

Fyrr í mánuðinum ræddu Arsenal og Sheffield United um hugsanleg félagaskipti Ramsdale til Lundúna. Þá gengu skiptin hins vegar ekki eftir, að því er talið vegna verðmiða sem Sheffield United setti á leikmanninn. Upphæðin sem félagið vildi var um 30 milljónir punda.

Nú virðist sem svo að viðræður séu farnar aftur af stað. Ramsdale gæti enn gengið í raðir Arsenal.

Þar myndi hann berjast um byrjunarliðsstöðuna við Bernd Leno, núverandi aðalmarkvörð.

Rúnar Alex Rúnarsson er sem stendur varamarkvörður Arsenal. Samkvæmt Sky Sports myndi kom Ramsdale þýða það að Rúnar færi annað.

,,Ef Ramsdale kemur inn munu þeir leyfa Rúnarssyni, sem er núna markvörður númer tvö, að fara frá félaginu,“ sagði fréttamaður stöðvarinnar.