Arsenal er að bjóða Granit Xhaka, miðjumanni liðsins, nýjan samning sem myndi gilda til ársins 2025. Þá myndi Svisslendingurinn einnig hækka í launum. Það er Fabrizio Romano sem greinir frá þessu.
Hinn 28 ára gamli Xhaka hefur verið orðaður við Roma í allt sumar. Talið var að skipti hans til Ítalíu lægju í loftinu.
Roma hefur hins vegar ekki enn viljað ganga að kröfum Arsenal er kemur að kaupverði. Enska félagið hafnaði síðasta tilboði þeirra upp á 12 milljónir evra, með 3 milljónum til viðbótar sem myndu greiðast yfir lengra tímabil.
Arsenal virðist því vera að gefast upp. Félagið er bjartsýnt á að gera nýjan samning við hann.
Nýji samningurinn hjá Arsenal myndi færa Xhaka hærri laun en hann hefði fengið hjá Roma.
