Mikael Nikulásson, sérfræðingur í hlaðvarpsþættinum The Mike Show, segir framherja Víkings Reykjavík, Nikolaj Hansen, vera besta leikmann Pepsi Max-deildarinnar eins og er.

Hinn 28 ára gamli Hansen hefur verið magnaður fyrir Víkinga í sumar. Hann er kominn með 13 mörk í 14 leikjum í deildinni.

,,Víkingar eru með besta leikmanninn í deildinni í sínu liði í dag. Það er bara svoleiðis,“ sagði Mikael í nýjasta þætti The Mike Show.

Víkingar ollu vonbrigðum á síðustu leiktíð. Þeir höfnuðu í tíunda sæti deildarinnar. Nú er liðið hins vegar í toppbaráttu. Nánar til tekið í öðru sæti, stigi á eftir toppliði Vals.

Mikael segir mörk Hansen vera muninn á liðinu frá því í fyrra.

,,Þetta er bara munurinn á Víkingi frá því í fyrra, markahæsti leikmaður Víkings í fyrra var með þrjú mörk eða eitthvað. Hann er kominn með 12-13 mörk. Þetta eru bara öll þessi aukastig.“

,,Þessi gæi var bara ekki búinn að gera nokkurn skapaðan hlut í íslenskum fótbolta fyrir þetta tímabil. Hann er leikmaður mótsins ‘so far’ á þessum tímabili.“