Twitter-færsla Joey Barton, knattspyrnustjóra Bristol Rovers, frá 2015 lítur mjög illa út fyrir hann nú í ljósi atburða síðustu daga.

Barton, sem er fyrrum atvinnumaður í knattspyrnu, er sakaður um að hafa veitt eiginkonu sinni höfuðáverka fyrr í sumar.

Atvikið á að hafa átt sér stað fyrir utan heimili vinafólks hjónanna. Eftir hávært rifrildi er Barton sakaður um að hafa gripið um háls McNeil og svo sparkað í höfuð hennar. Í kjölfarið fékk hún blóðnasir.

Barton mætti fyrir dóm á mánudag þar sem hann hafnaði ásökununum.

Þetta mál er alls ekki það fyrsta sem Barton kemur sér í vandræði fyrir. Hann fékk til að mynda dóm árið 2008 fyrir að ráðast á liðsfélaga sinn hjá Man City á æfingu. Þá sat hann inni fyrir aðra líkamsárás það sama ár.

Auk þess var Barton sífellt að koma sér í vandræði inni á knattspyrnuvellinum sjálfum, er hann var leikmaður á sínum tíma, fyrir slæma hegðun sína.

,,Hvernig geturðu lamið konur oft og kennt um atviki sem gerðist fyrir áratug? Menn sem lemja konur eru ekkert nema fávitar,“ skrifaði Barton á Twitter árið 2015. Vakin var athygli á tístinu í kjölfar ásakanna á hendur kappans.

Hér fyrir neðan má sjá tístið.