Freyr Alexandersson, stjóri Lyngby í dönsku B-deildinni, var stoltur af sínu liði eftir sigur í fyrsta leik tímabilsins gegn Nyköbing í dag. Lyngby skoraði sigurmarkið seint í uppbótartíma í 1-2 sigri.

,,Þetta var frábært. Þetta var ótrúlega erfiður leikur. Nyköbing spiluðu mjög vel, spiluðu sem heild. Þeir koma auðvitað úr C-deild og við höfðum spilað við þá æfingaleik. Það er virkilega erfitt að spila gegn þeim,“ sagði Freyr í viðtali við heimasíðu Lyngby eftir leik.

Freyr var virkilega ánægður með að hans lið hafi siglt sigrinum heim eftir erfiðan leik. Hann segir leikmennina hafa átt það skilið

,,Að koma hér og skora á síðustu mínútu var frábært. Ég er svo glaður fyrir hönd leikmanna sem hafa lagt hart að sér hvern einasta dag. Við vissum að þetta yrði erfiður leikur. Þetta var upp og niður frammistaða hjá okkur eins og oft í fyrsta leik.“

Varamaðurinn Rasmus Pedersen gerði sigurmark Lyngby í dag. Freyr var ánægður með þá leikmenn sem komu inn af bekknum, sem og liðið í heild.

,,Ég er svo stoltur af þeim leikmönnum sem byrjuðu á bekknum en komu svo inn með krafti. Allir leikmennirnir ættu að vera stoltir og glaðir.“

Viðtalið í heild (á dönsku) má sjá hér fyrir neðan.