Íslendingar voru í eldlínunni í sænsku úrvalsdeildinni í dag.

Jafnt hjá Hacken og Elfsborg

Oskar Sverrison lék allan leikinn með Hacken í 1-1 jafntefli gegn Elfsborg. Valgeir Lunddal Friðriksson var á varamannabekk liðsins allan leikinn. Þá var Hákon Rafn Valdimarsson í hóp hjá Elfsborg í fyrsta sinn í deildinni. Hann var varamarkvörður.

Elfsborg er í þriðja sæti deildarinnar með 23 stig. Hacken er í því sjöunda með 16 stig.

Jón Guðni hafði betur gegn Ara

Jón Guðni Fjóluson lék allan leikinn með Hammarby í 2-1 sigri á Norrköping. Ari Freyr Skúlason lék um klukkustund fyrir tapliðið. Þá var Ísak Bergmann Jóhannesson, leikmaður Norrköping, í leikbanni vegna uppsafnaðra gulra spjalda.

Hammarby er í fjórða sæti deildarinnar með 21 stig. Norrköping er í því sjötta með 17 stig.