Juventus ætlar hugsanlega að bjóða Cristiano Ronaldo til PSG og fá Mauro Icardi í staðinn frá franska félaginu.
Ronaldo á eitt ár eftir af samningi við ítalska stórveldið og er framtíð hans í óvissu þar sem Massimiliano Allegri, þjálfari Juventus, vill gera stórar breytingar á leikmannahópnum fyrir komandi leiktíð eftir slakt síðasta tímabil.
Samkvæmt L´Equipe vill Juventus fá Mauro Icardi og ætla að bjóða Ronaldo til PSG í staðinn. Talið er að það sé klásúla í samningi Icardi við PSG þar sem klúbburinn þarf að borga Inter Milan um 12 milljónir evra ef þeir selja hann til ítalsks félags.
PSG er talið hafa áhuga á þessum skiptum þar sem félagið þráir að vinna Meistaradeild Evrópu og það er eitthvað sem Ronaldo hefur gert oft áður.
Ronaldo setti inn mynd á Instagram í gær sem vakti athygli og umræðu um framtíð hans en hann skrifaði undir myndina „ákvörðunardagur“. Aðdáendur kappans hafa velt því fyrir sér hvort hann sé að tala um þessi hugsanlegu félagsskipti.
