Fyrsti titill Lionel Messi með Argentínu kom um síðustu helgi er liðið sigraði Copa America en það setur hann ekki á sama stall og Diego Maradona samkvæmt Mario Kempes.
Messi hafði tapað þremur úrslitaleikjum í Copa America og úrslitaleik HM árið 2014 þar til hann náði loksins að landa titli með Argentínu.
Angel Di Maria skoraði sigurmarkið í úrslitaleiknum gegn Brasilíu og gat Messi ekki annað en grátið úr gleði yfir því að hafa loksins náð þessu markmiði. Hann átti frábært mót, skoraði fjögur mörk og gaf fimm stoðsendingar. Kempes er þó ekki á því að Messi verði nokkurn tíma sama goðsögn og Maradona í heimalandinu.
„Það versta sem Messi hefur þurft að þola er að hann kom beint á eftir Diego Armando Maradona. Og það er erfitt að taka fram úr Diego þar sem hann var dáður af öllum,“ sagði Kempes við ESPN í Mexíkó.
„Það skiptir ekki máli hversu mikið hann vinnur eða hvað hann vinnur, það getur aldrei verið borið saman við það sem Diego gerði.“
