Sádí Arabía og Ítalía eru að íhuga að reyna að fá að halda heimsmeistaramótið í knattspyrnu saman árið 2030. The Athletic fjallar um málið.

Þetta vekur mikla athygli í ljósi þess að um 3600 kílómetrar eru á milli landanna.

Sú hugmynd hefur einnig komið upp að Sádí Arabía reyni að fá mótið ásamt Marokkó og Egyptalandi. Það myndi hins vegar þýða að tvö síðastnefndu löndin þyrftu að halda í miklar framkvæmdir.

Bjóði Ítalía og Sádí Arabía sameiginlega í mótið er líklegt að löndin myndu keppa við Bretland og Írland. Tvær síðastnefndu þjóðirnar vilja fá að halda HM 2030 saman.

FIFA hefur hingað til ekki verið sérlega hrifið af því að lönd haldi HM saman. Nú á hins vegar að fjölga þátttökuþjóðum upp í 48 talsins fyrir HM 2026 í Bandaríkjunum, Mexíkó og Kanada. Því er sambandið hlynnt því að fleiri en ein þjóð sameinist um að halda svo stórt mót.

Einhverjar áhyggjur eru þó af mannréttindamálum og stöðu verkafólks í Sádí Arabíu, fái þeir að halda mótið.