Bukayo Saka hefur sent frá sér yfirlýsingu í fyrsta sinn eftir tap Englands í úrslitaleik Evrópumótsins gegn Ítalíu á sunnudag.

England tapaði í vítaspyrnukeppni. Saka, Jadon Sancho og Marcus Rashford tókst ekki að skora úr sínum spyrnum. Allir eru leikmennirnir dökkir á hörund og fengu þeir því miður fjölda skilaboða frá óprúttnum aðilum þar sem það var notað gegn þeim.

,,Ég hef haldið mig frá samfélagsmiðlum undanfarna daga til að eyða tíma með fjölskyldu og melta síðustu vikur aðeins. Þessi skilaboð verða ekki nóg til að sýna hversu þakklátur ég er fyrir allan þann kærleik sem þið hafið sýnt mér,“ byrjaði Saka á að skrifa í yfirlýsingunni.

Hann segir að það hafi verið algjör heiður að leika fyrir enska landsliðið og að hann hafi lært mikið.

,,Það var heiður að spila fyrir England. Þetta verða bræður mínir að eilífu og ég er þakklátur fyrir allt sem ég hef lært frá öllum leikmönnum og starfsfólki. Að hjálpa liðinu að komast í úrslit í fyrsta sinn í 55 ár, að sjá fjölskylduna mína uppi í stúku eftir allt sem þau hafa gert fyrir mig, þetta er svo þýðingarmikið fyrir mig.“

Saka kveðst virkilega leiður yfir úrslitunum á sunnudag  en er viss um að þetta enska lið muni ná árangri í framtíðinni.

,,Ég kem því ekki í orð hversu svekktur ég er með úrslitin og vítaspyrnuna mína. Ég hélt að við myndum vinna þetta fyrir ykkur. Mér þykir það leitt að við höfum ekki getað komið með bikarinn heim fyrir ykkur en ég lofa að þessi kynslóð mun gera allt sem í hennar valdi stendur til við munum þekkja hvað það þýðir að vinna.“

Saka þakkaði svo þeim sem hafa stutt við bakið á honum síðustu daga innilega fyrir.

,,Til ykkar sem hafið stutt mig og sent mér hjartnæm bréf, sent hlýjar kveðjur til mín og fjölskyldu minnar, ég er svo þakklátur ykkur. Þetta er það sem fótbolti ætti að snúast um. Ástríða, fólk af öllum kynþáttum, kynjum, trúum og bakgrunnum að koma saman til að njóta þess rússíbana sem fótboltinn er.“

Að lokum tók Saka fram að hann væri svekktur með samfélagsmiðla og hvernig þeir taka (ekki) á kynþáttaníði.

,,Við samfélagsmiðlanna Instagram, Twitter og Facebook, ég vil ekki að neitt barn eða neinn fullorðinn þurfi að fá jafn hatursfull og særandi skilaboð sem ég, Marcus og Jadon höfum fengið í vikunni. Ég vissi strax hvers konar hatur ég myndi þurfa að upplifa og það er sár veruleiki að þið notið ekki ykkar valdamikla vettvang til að stöðva þessi skilaboð.“

,,Ástin sigrar alltaf,“ skrifaði Saka að lokum. Yfirlýsingu hans í heild má sjá hér fyrir neðan.

pic.twitter.com/KAibQRYH2T

— Bukayo Saka (@BukayoSaka87) July 15, 2021