,,Ég held það þurfi kraftaverk til að Þróttarar bjargi sér (frá falli),“ sagði Kristján Óli Sigurðsson í markaþætti Lengjudeildarinnar á Hringbraut í gær.

Þróttur Reykjavík hefur aðeins 7 stig eftir ellefu leiki í Lengjudeildinni í ár. Liðið er 2 stigum frá öruggu sæti.

Þróttarar hafa verið í fallbaráttu í næstefstu deild undanfarin tímabil en þó alltaf tekist að bjarga sér fyrir horn.

,,Það er ljóst að þjálfarar eru ekki vandamálið í Þrótti. Það er búið að reyna allt og alltaf er niðurstaðan sú sama. Það er kjallarabaráttan. Það er bara greinilega eitthvað sem þarf að breyta í félaginu,“ sagði Hörður Snævar Jónsson, þáttastjórnandi.

Kristján Óli segir að stöðvun á tímabilinu í fyrra vegna kórónuveirufaraldursins hafi bjargað Þrótti frá falli það árið.

,,Í lok tímabils í fyrra voru þeir nú komnir með fjóra eða fimm þjálfara og þeir héldu sér náttúrulega bara uppi af því mótið var blásið af. Þeir hefðu alveg getað farið niður þá. Þetta er búið að hanga yfir dalnum. Vonandi bara læra þeir af þessu og koma þá bara sterkari upp á næsta ári.“

Umræðuna um Þrótt sem og markaþátt Lengjudeildarinnar í heild sinni má sjá hér fyrir neðan.